O multiinstrumentista galego Abraham Cupeiro puxo o pasado venres o broche de ouro á xira de presentación do seu novo álbum, “Loira”, con concertos inesquecibles e entradas esgotadas en Ourense, Pontevedra, Ferrol e A Coruña.
“Loira”, un disco que leva o nome da súa cadela, é unha recompilación de temas variados e persoais, algúns deles “pezas perdidas nun caixón desde hai anos”. Cupeiro e o seu brillante grupo de artistas ofreceron actuacións vibrantes e emotivas que conquistaron ao público galego.
Este peche de xira en Galicia chega despois dun ano intenso para Cupeiro, marcado polo triunfo do seu anterior disco, “Mythos”, gravado coa Royal Philharmonic Orchestra en Abbey Road.
A formación clásica de Cupeiro, complementada pola súa paixón por diversos estilos musicais como o folk, o jazz e a música antiga, convérteo nun artista único e versátil. O éxito da xira “Loira” en Galicia reafirma a súa conexión co público da súa terra e marca un novo capítulo na súa brillante traxectoria musical.
