- Reinventio presenta o sábado 17 de xaneiro en Santiago de Compostela, onde ofrecerá dúas funcións. Última parada desta xira que está a espertar unha resposta extraordinaria do público.
- A produción articúlase en catro actos e preto de 25 números nos que maxia, circo e danza funcionan como unha única linguaxe, sostida por unha engrenaxe técnica de alta complexidade que redefine o espectáculo en cada teatro.
- As entradas para as funcións no Auditorio de Galicia de Santiago de Compostela continúan dispoñibles en www.reinventio.gal e www.ataquilla.com.
Co paso das funcións, a dimensión emocional do espectáculo foi tomando cada vez máis protagonismo. En cada cidade, Reinventio incorporou unha lectura distinta, unha forma nova de ser recibida, e moitas persoas describen a experiencia como unha oportunidade para reconectar coa ilusión. Esa resposta, que se intensificou co tempo, confirma que a proposta non só funciona como montaxe artística, senón como encontro sensitivo capaz de activar unha emoción íntima no público.
Para o creador, o ilusionista Martín Varela, este tramo final simboliza algo fundamental: a maneira na que Reinventio foi atopando novas capas e matices a medida que avanzaba a xira, revelando pequenos detalles que só aparecen cando o espectáculo se encontra con públicos distintos. “O que máis nos conmociona é que moita xente describe Reinventio como un lugar ao que volver, non só como un espectáculo”.
A montaxe estrutúrase en catro actos e preto de 25 números, que debuxan unha viaxe emocional entre a escuridade e a luz. Maxia, circo e danza conviven aquí non como disciplinas separadas, senón como unha linguaxe común que se manifesta a través do corpo, do movemento e da ilusión. Cada escena está concibida como parte dun relato que se sostén tanto no impacto visual como na sensibilidade interpretativa.
Esta identidade complétase cunha engrandeza técnica de alta precisión, na que iluminación, son, vídeo, escenografía, tremoia e efectos de gran formato funcionan como unha engrenaxe única. Thinking Up Events adapta cada detalle ao teatro que visita, convertendo cada función nun exercicio de artesanía escénica: desaparicións, aparicións, números aéreos de risco e momentos de suspensión capilar conviven nun dispositivo que require sincronización absoluta entre o corpo e a maquinaria.
Ao longo dos seus 90 minutos sen descanso, Reinventio constrúe unha viaxe simbólica que dialoga co espírito do Camiño de Santiago, entendido como tránsito, procura e capacidade de transformación persoal. A creación afirma así un modelo de espectáculo galego de gran formato, elaborado no país e pensado para recuperar a forza da emoción compartida.
Reinventio non pretende explicar o mundo, senón recordarnos o que o fai habitable: a beleza, a emoción colectiva, a capacidade de crer no que non se ve. Un espectáculo de Thinking Up Events, que conta co patrocinio da Xunta de Galicia a través da Axencia de Turismo de Galicia, que celebra o instante no que a maxia —esa palabra tan usada e tan pouco entendida— volve significar algo real.
A xira conclúe esta etapa en Santiago de Compostela o 17 de xaneiro no Auditorio de Galicia. As entradas están dispoñibles en www.reinventio.gal e www.ataquilla.com.
HISTORIA. Reinventio é un espectáculo visualmente abraiante que mergulla o espectador nunha aventura sen precedentes. A narración segue a un mago que perdeu a súa ilusión e tenta recuperala ao percorrer os seus soños e pesadelos. O show transfórmase nun cabaret narrativo vibrante, rebosante de beleza e emoción, onde o circo, a danza e a maxia se converten nas pegadas dun camiño compartido. O público é convidado a un universo onírico no que a realidade se desdobra en aparicións e desaparicións imposibles, levitacións que desafían a gravidade, actos de circo que cortan a respiración e coreografías que encarnan a esencia da ilusión.
EQUIPO ARTÍSTICO E ELENCO. Nesta creación, o elenco convértese nun corpo vivo que respira ao ritmo da escena, unha combinación de talento galego e voces internacionais que amplían a linguaxe do movemento e da maxia. Xuntos constrúen unha paisaxe plural —de Galicia a Venezuela, Portugal, Suíza e Ucraína— que devolve ao escenario esa idea de ilusión como territorio común.
Á fronte do equipo sitúase Martín Varela, artista e creador ferrolán cunha traxectoria marcada pola integración de maxia, danza e circo en espectáculos de gran formato. A dirección coreográfica corre a cargo de Mercedes Suárez, figura esencial da danza en Galicia e fundadora de Druida Danza, cuxo traballo sostén a arquitectura do movemento. A iluminación leva a sinatura de Alberto Casas, profesional cunha longa traxectoria en danza, circo e música, que dota cada escena dunha atmosfera propia.
O apartado circense reúne a artistas internacionais cunha traxectoria que atravesa escenarios de Europa, Asia e América. A suíza Milena Blatter, especialista en handbalancing, contorsión e suspensión capilar, achega unha presenza física e poética de enorme impacto visual. O artista portugués Andrew Noronha, vinculado ao circo desde os dous anos e formado entre compañías como Urien Circus, Circo Arena ou Circo Leandros, incorpora ao espectáculo a súa experiencia en malabares e en linguaxes circenses que combinan tradición familiar e técnica contemporánea. Xunto a eles, os ucraínos Andrii Malyna e Anastasiia Kupriyashenko, ambos con múltiples premios internacionais e unha longa experiencia en compañías europeas, aportan foot-juggling, acrobacia, patinaxe escénica e unha batería de técnicas que expanden os límites físicos do espectáculo.
O corpo de baile conforma outro dos piares fundamentais da produción. O venezolano Anthony Brenner, e as bailarinas galegas Julia Méndez, Laura Pan Meirama, Cris Amor e Fernando Rois, formados en Druida Danza, no Conservatorio de Lugo, no Centro Coreográfico Galego ou en compañías nacionais e internacionais, unen rigor clásico, contemporaneidade e musicalidade nunha lectura corporal que vertebra a escena.
Xuntos conforman un elenco no que a técnica, a emoción e a diversidade de traxectorias se unen para dar forma a un espectáculo que celebra o asombro, a beleza e esa capacidade de crer no imposible que sostén toda ilusión.
